17 Novembre 1861, La Camorra, Pulicenella e lo Diavolo Zuoppo – Spassatiempo de Napole e trentaseje casale, ANNO I, num. 117.
Uno de li piecche che se so date a Napole da l’Amabilissemo, Accellentissimo e Sbriognatissemo Piemontesemo è stato chillo che ccà, a sta cetà simmo na maniata de cammorriste, che sapimmo dicere sulo:
– Lo mio è mio, e lo tujo è mio!
Vedite, signure mieje, si nce po essere no scontrufolo cchiù scontrufolo de chisto?
Chesto a chi lo po dà a ‘ntennere lo Piamonte? – a l’abbetante de la Cina, a chille de lo Giappone, ma non già a uommene co la vavara longa ‘nfaccia e co ttre-ddeta de cerviello dinto a la cocozza, che non è certo pane-cuotto!
Eppure l’à ditto!
Mille grazie de la notizia. Che nce vole a dicere na cosa: io pure pe n’assempio pozzo dicere: Tutto lo munno è de lo mio.
La dimostrazione nce vole ed è pe cchesto che io me scappello nnante a tutte l’appasionate de Linardo mieje e le chianto na proposezione apprimma comm’a na carota, zoè:
– A Torino so tutte cammorriste!
E po doppo nce schiaffo sotto na dimostrazione longa quant’a na predeca de patre e Cappellone (de svergognata mamoria) – ghiernò, dico meglio, ciovè, me spieco meglio, corta corta e zucosa comm’a no lemone da spremmere.
Tornammolo a ddicere, azzò no nce lo scordammo:
– Torino è no cammorrista.
E sapite pecchè? – Pecchè a tutte le pparte nfila lo naso sujo e vo la parte – e sinò? … se la piglia pe fforza. Napole quanno maje è stato tanto ficcanaso comm’a Torino? Quanno maje è nnata a Napole la camorra? Addò se canosce a Napole la camorra?…
La camorra si à avuto no luoco addò è nnata e addò è stata vattiata, sto luoco è Torino…si la camorra s’è fatta grossicella…s’è smammata a Torino…nzomma Torino e la Camorra ànnno combinato co lo tiempo no bello matremmonio; perzò tutte li figlie de Torino so tutte cammorriste. Cammorriste li mpiegate – Cammorriste li Menistre – Cavour e Ricasoli, duje cammorriste de primma sfera – E una de le raggiune pe le quale Zi Peppe s’è arrassato da Torino, e da tutte li mbruoglie de lo Menisterio è stata chella, de non sta nzieme co na maniata de cammorriste!
Fanti è no cammorrista – Cammorrista è addeventato puro lo Parlamiento pecchè à prattecato co lo Menesterio.
Cammorriste! cammorriste! cammorriste!
E po pe luvarse la maschera che tteneno nfaccia sti signure vanno decenno che a Napole sulo nce sta la Camorra.
Sbriugnate! mariuncielle! Sciù, pe la faccia vosta…
Lo Diavolo Zuoppo non tene pile ncopp’a la lengua e ve la canta sempe comme la sente, e comme la sente isso la sentono tutte li paisane suoje, che ssongo na meseria de 9 meliune de perzune!
Scusa Torì, agge pacienza sa, si è ppoco chello che t’aggio ditto, speranno n’autra vota de darte n’autra refola de soddisfazione!
da: http://ilnapolitano.com/post/12380044364/a-torino-so-ttutte-cammorriste